Âb-ı Sâfî Ol Seni Bâlâ Eder Ebr-i Füyûz

5 Şubat 2023 tarihinde yayınlanmıştır.

NUTK-İ ŞERİF

Âb-ı sâfî ol seni bâlâ eder ebr-i füyûz

Nehr-i cârî ol yem-i yektâ eder bahr-i füyûz

Mâye-i pâk-i musaffâ ol cilâ-yı 'aşk ile

Nûr-i Feyyâz-i ezelden feyz ola sadr-ı füyûz

Cümle eflâk-i derûn âfâk sehâbın zâil et

Nûr-i şemsin ma'kesiyle 'aksede bedr-i füyûz

Tîğ-i tevhîd ile mahv-ı sırfa ermek ibtidâ

Zât sıfat ifnâsıdır zât feyzine nezr-i füyûz

Yirmi yedi menzili geç hem-nişîn-i vahdet ol

Bahş ola inzâl-i Leyletü'l-Kadr-i füyûz

Vuslat-ı aslü'l-usûl ile bilinmişdir vusûl

Şems-i zâta ermeyenler edemez neşr-i füyûz

Mebde-i teslîm ile bul müntehî irşâdını

Sevk olur sırdan sırra seyrân ile sırr-ı füyûz

Cümle telvîn-i sivâdan sîne-sâf ol 'âşıkâ

Çün sadef-pâk dillere oldu nasîb dürr-i füyûz

Âşiyân-ı lâ-mekân olsa dil-i müştâk eğer

Tayr-ı lâhûtî 'ankâya eder hasr-ı füyûz

Kim cihâd-ı ekber-i a'dâya 'azm-i tâmm eder

'Azmi nisbetde erer Hakk'dan ona nasr-ı füyûz

Vahdete mir'ât olan dil ka'be-i ma'nâ-yı zât

Kalmaz anda nisbet-i zâtiyyeden gayr-ı füyûz

Bahr-i nûr-i zâta gark ol Sâmiyâ bî-ihtiyâr

'Âşık-ı bî-ihtiyâra feyz olur hayr-ı füyûz

Şeyh Abdurrahmân Sâmî Saruhânî

Kaddesallahu Sırrahu'l-Fettâhî