MuzafferOzak.com (Türkçe)

NA'T-I ŞERÎF

Âb levhi üzre çekmiş mevcden misler sabâ

Sebzeden nakl etmeğe vasf-ı hat-ı dil-ber sabâ

Almak için kıymetiyle sebzeden şeb-nem dürün

Yâseminden sîm dökmüş yâ semenden zer sabâ

Ağzın esrârın diler fâş ide açup gonceni

Gör ne reng ile kılar izhâr-i her muzmer sabâ

Encümenler seyr edüp nesrin beyâzın gezdirir

Hüsn-i hulkunda dürüst etmek diler mahzer sabâ

İnfi'âl etmiş meğer sür'atde rahşından senin

Kim gezer mahfî görünmez kimseye micher sabâ

Aktarup bulmak diler vasf-ı ruhün kim muttasıl

Nusha-i gül-berg evrâkın kılar ezber sabâ

Âb-gûn tîğınca olmaz bunca kim dâim verir

Tîğ-i âb-i cûybâre mevcden cevher sabâ

Ayağın toprağını yerden alır ta'zîm ile

Gâlibâ düzmek diler başına bir efser sabâ

İşitüpdür gâlibâ kaddinle şem'in bahsini

Her kaçan gördüyse eyler şem'e kasd-i ser sabâ

Âsitânında mukîm olmağa bulsaydı kabûl

Hakk bilir olmazdı ser-gerdân-i bahr ü ber sabâ

Âsmâne kadr ile çıksa ne hâsıl çün değil

Ana kâbil kim ola tapunda hâk-i der sabâ

Âteş-i bî-dâde köymüşdür olupdur dâd-hâh

Gördüğü yerde saçar başına hâkister sabâ

Âb-ı deryâ üzre geh İlyâs veş seyrân ider

Gâh eyler mesken İbrâhim tek Âzer sabâ

Oddan âfet görmez ü sudan zarar gûyâ kılar

Kanda olsa iktida-yı şer'-i Peygamber sabâ

Ahmed-i mürsel ki fermân-ber Süleymân'dır ana

Öyle kim gördü Süleymân oldu ferman-ber sabâ

Ey gül-i bâğ-i rusül bir tâze gülşendir kapun

Kim dem-i Cibrîl'e ol gülşende ta'n eyler sabâ

İsteyüp bulmaz kapun feyz almak için muttasıl

Hansı gülşen seyrine girse çıkar muzter sabâ

İletir hâk-i derini zerre zerre gülşene

Kılmak için tûtiyâ-yı dîde-i ahber sabâ

Âteş-i bî-dâd ile 'âlem yanar ger kılmasa

'Adlini şâyi gezüp her dem yedi kişver sabâ

Olduğuyçün zerre tek pinhân girer gülşenlere

Bî-sebeb raht-ı gül ü nesrine gâret-ger sabâ

Öz günâhına şefâ'at isteyüp feryâd edüp

Çizginir hâk-i mezarın üzre tâ mahşer sabâ

Etmezem terk-i temennâ-yı tavâfın çıksa cân

Hâk hem olsam gubârımı sana ilter sabâ

Açmış ümmîd-i reh-i vasim dil-i pür hûnumu

Öyle kim fasl-ı bahâr açar gül-i ahmer sabâ

Ola na'tinde Fuzûlî'nin kelâmı dil-pezîr

Öyle kim gülden bulur enfâs-i can-perver sabâ

Öyle inceldim za'îf oldum ki hâk-i kûyüne

Kabilim hâşâk tek olsa bana rehber sabâ

İltimasını bahtdan oldur ki hükmün 'âleme

Ola cârî tâ çemen mülkündedir server sabâ

Fuzûlî

Âb Levhi Üzre Çekmiş Mevcden Misler Sabâ