Aç Gözün Dinle Gönülden Sana İdem Feth-i Bâb
27 Aralık 2021 tarihinde yayınlanmıştır.
NUTK-İ ŞERÎF
Aç gözün dinle gönülden sana idem feth-i bâb
Âsumân-ı kalb şimdi şu'le saldı âfitâb
Nüsha-i insânı gör kim oldurur fazlu'l-hitâb
Nüsha-i insânı şerh ider beğim yüz dört kitâb
Âdem'i seb'u'l-mesânî sırrına mazhar kılan
Anın içün nüshasını eylemişdir yedi bâb
Yedi bâbın her birinde olmuş on bin suâl
Nüsha-i insânda tahkîk oldu yetmiş bin cevâb
Kim hevâdan men' iderse dostun oldur şübhesiz
Anın içün derler tûbâ ile hüsn-i meâb
Câm-ı "Hû"dan nûş iden erbâb-ı 'aklın şürbünü
Öyle bulmuşlar ki zevki istemez kevser şerâb
Bâğ-ı vahdet bülbülüdür dâim ider gulgulü
Tûti-i sükker lisânın nice anlasın gurâb
Kande baksa "semme vechullah" şühûdun eyleyen
'Ârif-i billaha görünmez bu görünen serâb
Ma'nevî tullâb-ı 'aşka cânı koşdunsa eğer
Deme kim döndürürüm gâyet ağırdır bu dolâb
Manevî Mustafâ Efendi
Kuddise Sırruh