Aceb Kârhânedir Dünyâ Giden Hayrân Gelen Hayrân
10 Ocak 2021 tarihinde yayınlanmıştır.
NUTK-İ ŞERÎF
'Aceb kârhânedir dünyâ giden hayrân gelen hayrân
Ne turfa tîh-i hayretdir eden hayrân kılan hayrân
Kamu zerrât tûr olmuş tahayyürde bu halk nâcî
Ne rağbet Sâmirî-vasfa şu yerde ki bilen hayrân
'Aceb bâzâra tuş oldum satılır muhtelif kâlâ
Ne sûd u ne ziyân belli satan hayrân alan hayrân
Nazar kıl 'ulvî ger süflî kimi sâkin kimi pûyân
Bulunmaz bir eşi bitmiş duran hayrân yelen hayrân
Kimi mâtem-zede halkın ferahdan kimisi handân
Kimi giryeyle hasretde safâ ile gülen hayrân
Kimi göçmekde hasretle kimi ardınca mihnetle
'Aceb hayret değil mi göçen hayrân kalan hayrân
Kimi kâf-ı tahayyürde kimisi matlabın bilmez
'Aceb budur ki ey Şemsî kamusunda bulan hayrân
Şemseddin Sıvâsî
Kuddise Sırruh