Açıkdır Bâb-ı Rahmet Sarf-ı Himmet Eyle Er Ol Er
14 Ekim 2023 tarihinde yayınlanmıştır.
NUTK-İ ŞERÎF
Açıkdır bâb-ı rahmet sarf-ı himmet eyle er ol er
Senindir cümle ni'met bezl-i ni'met eyle er ol er
Uçar her kuş ne tâkat var ise kendi kanadında
Cebîn olma emîn ol hâle dikkat eyle er ol er
Seni yâ himmetin ya hizmetindir eyleyen 'âlî
Serâser vâr-ı ömrün hasr-ı hizmet eyle er ol er
Buyurdu Fahr-ı Âlem "inneme'l-a'mâlu bi'n-niyyât"
Vücûdun Hakk yolunda mahva niyyet eyle er ol er
Hemîşe Hakk'ı bilmek Hakk'ı bulmak olsun efkârın
Sebât et sâdıkâne 'azm u gayret eyle er ol er
"Salât-ı dâimûn" bil 'aşk-ı dâimle olur hâsıl
Kemâlî kâmilin bul 'aşka rağbet eyle er ol er
Osman Kemâlî Efendi
Kuddise Sırruh