Açıldı Cennetin Bâbı Nesîm-i Pür-Safâ Geldi
30 Kasım 2016 tarihinde yayınlanmıştır.
NA'T-I RESÛL
Açıldı cennetin bâbı nesîm-i pür-safâ geldi
Gülistân-ı cihâna revnak u hüsn ü bahâ geldi
Derûn-i Mekke'den nûr-i nübüvvet parlayup çıkdı
'Avâlim nûra gark oldu Resûl-i Kibriyâ geldi
Beşîri ehl-i îmânın nezîri ehl-i tuğyânın
Habîbi Hakk Te'âlâ'nın Muhammed Mustafâ geldi
Saçıldı rahmet-i Rahmân açıldı sünbül-i reyhân
Bugün bâb-ı cihâna bülbül-i şi'r-edâ geldi
Anılsa her ne dem ism-i şerîfi feyzi hâzırdır
Bu gece bu meclise rûh-i resûl-i rehnümâ geldi
Vücûduyla şereflendi zemîn-i Yesrib ü Bathâ
Kudûmüyle bu zulmet-hâneye nûr-i zıyâ geldi
Melekler eyleyüp tebşîr dedi yâ ehl-i beytullah
Size Bârî Te'âlâ'dan Muhammed Mustafâ geldi
Sanemler devrilüp düşdü sarâyı çökdü Kisrâ'nın
Mecûsun âteşi söndü ki burhân-ı Hudâ geldi
Tarîk-i Hakk'ı göstermek içün hem inse hem cinne
Elinde Hazret-i Kur'ân imâmü'l enbiyâ geldi
Tilâvet eyleyince Hazret-i Kur'ân'ın âyâtın
Sudûr-i ehl-i îmâna ferah geldi şifâ geldi
Eyâ şâh-ı rusül senden şefâ'at bekliyor lutf et
Rızâ nâmında âvâre kapuna bir gedâ geldi
NAĞME-İ AŞK