Açlık ki Tok Eyler Ol Kamu A'zâyı
21 Mart 2023 tarihinde yayınlanmıştır.
NUTK-İ ŞERÎF
Açlık ki tok eyler ol kamu a'zâyı
Açlıkda bu nefis terk eder dünyâyı
Hem açlık açar rumûz-i her ma'nâyı
Açlıkda bulur bu cân ü dil Mevlâ'yı
Nândan boş olan kimse pür-hikmetdir
Gönlü gözü uyanık işi 'ibretdir
Açlık ki tamâm-ı hıffet ü 'iffetdir
Her derde şifâdır ol tene sıhhatdir
Hakkı az ye eyle batna hulku mîzân
Açlıkda yok ol ziyân ki toklukda 'ayân
Açlıkdan olan ziyâna besdir bir nân
Toklukda marazlara gerek çok dermân
Hakkı yemek az ye az uyu az söyle
Cân sağlığı dil hoşluğu bul sen öyle
Her ne dilesen gönlünde bul zevk eyle
Kim iki cihân sa'âdetidir böyle
Bend eyle dehânı bu cihânı seyr et
Koy hâbı gönülde her nihânı seyr et
'Aşk aça yürekde çün dehânı seyr et
Deryâlar içip safâ-yı cânı seyr et
Nefs ehline gerçi açlık olmuş zindân
Ammâ ki gönül ehlinedir hoş seyrân
Açlıkda gönül safâ bulur lezzet-i cân
Pes cû'dur ehl-i Hakk'a Hak'dan ihsân
Hakkâ ki ta'am-ı enbiyâdır açlık
Hem hâl ü makâm-ı evliyâdır açlık
Hem safvet-i kalb-i asfiyâdır açlık
Her derde devâ vü hoş nevâdır açlık
Hakkâ ki safâ-yı asfiyâ cû' olmuş
Takvâ vü reşâd-ı etkıyâ cû' olmuş
Hem fetânet-i re'y-i ezkiyâ cû' olmuş
Bil zirve-i cây-i irtikâ cû' olmuş
Çok uyumak oldu 'ilm ü fazlı hâdim
Nevvâm ü ekûl olur 'alîl ü nâdim
Şeb-kâim ü gündüzü dahî ol sâim
Tâ menba'-ı 'ilm ü fazl olasın dâim
Hakkı Hakk içün nehâr ü leyl ol kâim
Ölmezden ölüp sen ol gamından hâim
Oldukça bu nefs hay gönüldür nâim
Nefs ölse gönül bulur hayât-ı dâim
İbrâhîm Hakkı Erzurûmî
Kaddesallahu Sırrahu'l-Âlî