Açup Dü Dîde-i Cânı O Mihr-i Bî-bahâyı Bul

19 Mart 2018 tarihinde yayınlanmıştır.

NUTK-İ ŞERÎF

Açup dü dîde-i cânı o mihr-i bî-bahâyı bul

Geçüp vâdî-i hicrânı ezeller âşinâyı bul

Sıfât-ı fânîyi tekmîl edüp hakkânîye tebdîl

Cilâ-yı cezbe-i tehlîl ile nûr-i bekâyı bul

Hicâb-ı nefse gâlib ol sivâ zıllini sâlib ol

Dil ü cân ile tâlib ol o şems-i pür-zıyâyı bul

Düşüp Mecnûn gibi derde reh-i vahdetde perverde

Ferîd ol 'aşk ile ferde şeh-i hüsn-i bekâyı bul

Edüp İblîs gibi ibâ tarîk-i Hakk'a bî-pervâ

Cahîmi eyleme me'vâ libâs-ı etkıyâyı bul

Hayâtın olmadan fânî ola gör 'abd-i hakkânî

Bulup esrâr-ı Sübhânî safâ ender safâyı bul

Dilersen sermedî devlet hulûs-i kalb ile tâ'at

Edüp her ân ü her sâ'at ibâdetle ulâyı bul

Sırât-ı istikâmetden dili dûr etme tâ'atden

Çıkup hâl-i şekâvetden rumûz-i "kul kefâ"yı bul

Reh-i gaflet ile meşgûl olan yârın olur mes'ûl

Huzûrda olmağa makbûl bugün derde devâyı bul

Rızâdır cümlenin kâmı fenâdır halkın encâmı

Selîm et kalbini Sâmî cilâ-yı ıstıfâyı bul

Şeyh Abdurrahmân Sâmî Saruhânî

Kaddesallahu Sırrahu'l-Âlî