Âdem-i Ma'nâ Dürür Eşyâya Evvel İbtidâ
20 Mayıs 2020 tarihinde yayınlanmıştır.
NUTK-İ ŞERÎF
Âdem-i ma'nâ dürür eşyâya evvel ibtidâ
Âdem-i sûrî dürür eşyâya âhir intihâ
Âdem-i ma'nâ dürür rûh-ı menâfi' 'âleme
Cümle zerrât-ı cihân andan bulupdur intişâ
Oldu halvethâne-i Hakk cümle 'âlem serteser
"Leyse gayrullahi şey'ün" virdin okur ahfiyâ
Hamdülillâh ehl-i tevhîdiz ki bulduk zevk ile
'Ayn-ı vahdetdir bu 'âlem i'tibarîdir sivâ
Sûret-i tevhîdi kogıl ma'nâ-yı tevhîde var
Güftü'l-ma'nâ hüvallâh 'an Aliyyü'l-Murtazâ
Sırr-ı vahdetden haberdâr oldun ise şirki ko
Nice bir bu "lâ" vü "illâ" niceye dek hûy u hâ
Nice bir bu 'âlem-i kesretde devrân edesin
Merkez-i vahdetde kutb ol devr eden gelsin sana
Tâlib-i esmâ isen sen bil biz ism-i a'zâmız
İsm-i a'zâm sohbetiyle bul fenâ içre bekâ
Ya'ni esmâ vü müsemmâ 'ayn-ı âdemdir hemân
"Men 'aref nefseh fekad" remzini duydunsa dilâ
Sôfî kim vâkıf değil sırr-ı me'âd ü mebde'e
Mübtedîdir kendüyi isterse tutsun müntehâ
Bir vücûdun zâhiri vü bâtını Hakk olıcak
Nice sûret bağlar anda ibtidâ vü intihâ
Hâsılı gel gir tarîk-i vahdete ta'nı bırak
Yoksa vallahü'l-'azîm ermez sana feyz ü 'atâ
Sûret uğrusunu sanma râh-ı Hakk'da muktedâ
Her asırda birdir ancak hâmil-i sırr-ı Hudâ
Geldi altun silsileyle nûr-ı Hakk birden bire
Vech-i İbrâhîm'den oldu Gaybî'ye Hakk rû-nümâ
Fi'l-hakîka 'âşıka oldur sırât-ı müstakîm
Kim bir ola anda reh ü rehber ü hem reh-nümâ
Sun'ullah Gaybî
Kuddise Sırruh