Âh Eyle Gönül Âh ki Hûbân Ele Girmez
5 Kasım 2023 tarihinde yayınlanmıştır.
NUTK-İ ŞERÎF
Âh eyle gönül âh ki hûbân ele girmez
Feryâd ki feryâd ile cânân ele girmez
Varlıkla varılmaz der-i ihsânına yârin
İhsân ile ol sâhib-i ihsân ele girmez
Derd ehline dermân yine derd içre nihândır
Erbâb-ı dile derd gibi dermân ele girmez
Cân baş ile bil hizmet-i pîrânı ganîmet
Her şey bulunur sohbet-i pîrân ele girmez
Kaldırma yüzün hâk-i reh-i Şâh-ı Necef'den
Hayder gibi sultânlara sultân ele girmez
Ey nutfe iken ahsen-i takvîm olan insân
Bil kadrini bil sûret-i insân ele girmez
Tek bir nefesin gâfil olup verme hevâya
Sıhhat gibi bir ni'met-i Sübhân ele girmez
Her bir güzele meyl edüp âteşlere yanma
Yûsuf çok olur Yûsuf-ı Ken'ân ele girmez
A'mâlığına hırka-i peşmînine bakma
Osman gibi bir sâhib-i 'irfân ele girmez
Osman Kemâlî Efendi
Kaddesallahu Sırrahu'l-Âlî