MuzafferOzak.com (Türkçe)

NUTK-İ ŞERÎF

Âh kim döndü irüp encâmına devr-i zamân

Yâ ilâhî lutfuna mağrûr olup kaldık hemân

Şîşe-i çarh içre çün rîk akdı sâ'at-i 'ömr

İrdi akşâma güneş rûh oldu bu tenden nihân

Berf-i pîrî yağdı mûlar üstüne gitdi bahâr

Bâğ-ı ten soldu sarardı irdi çün fasl-ı hazân

Câm-ı 'ömründe hemân bir cür'a kaldı 'âlemin

Gitdi bezm-i 'ıyş u 'işret geldi hicrân nâgehân

Sen ne sandın rûzigârı ey cihândan bî-haber

Böyle mi kalır didin bülbüllere bu gülsitân

Hâbı ko hâlin tedârik eyle kıl tahfîf-i bâr

Yoksa kalmaz vakt-i rıhletde yolundan kârbân

Menzile irdi iren sen yolda kaldın 'âkıbet

Gel erenlerden haber al kanda gitdi dôstân

Sahn-ı bâğ-ı lâ-mekâna uçdular açdılar bâl

İtdiler gayb-ı guyûbu dilleriyle âşiyân

İbn-i vakt ol Hakkıyâ vaktin geçirme hâb ile

Tâ ebü'l-vakt oluban senden doğa her ân ân

İsmâil Hakkı Bursevî

Kaddesallahu Sırrahu'l-Âlî

Âh Kim Döndü İrüp Encâmına Devr-i Zamân