Ahsen-i Takvîm İmiş Çün Halk-ı Eşyâdan Garaz
19 Aralık 2021 tarihinde yayınlanmıştır.
NUTK-İ ŞERÎF
Ahsen-i takvîm imiş çün halk-ı eşyâdan garaz
Pes bu hüsnün sırrıdır "innâ 'aradnâ"dan garaz
"Mecma'u'l-bahreyn"den irdi cism ile câna 'atâ
Zâhir oldu nükte-i Hızr ile Mûsâ'dan garaz
Buldu "ahbebtü en u'raf" sırrına 'ârif vusûl
Bildi anı kim nedir remz-i "ledünnâ"dan garaz
İtmedir pergâr-ı vahdetle dü kevni der-harem
Hilkat-i hâk ile nâr u bâd ile mâdan garaz
Neş'e-i "el-yevme tüczâ" hâsılın bulduķ bugün
Bu durur maksûd olan imrûz u ferdâdan garaz
Almağa etfâl-i ervâh nokta-ı "bâ"dan sebak
Bil ki mektebhâne oldu çarh-ı mînâdan garaz
Emr ü halkı fark idüp firkatden olmakdır halâs
Ey Fenâyî neş'e-i sugrâ vü kübrâdan garaz
Ehl-i Cennet Fenâyî Mehmed Efendi
Kuddise Sırruh