Andan Beru Gönüldüm Dost İle Bile Geldim

14 Ekim 2019 tarihinde yayınlanmıştır.

NUTK-İ ŞERÎF

Andan beru gönüldüm dost ile bile geldim

Bu 'âleme çıkıcak bir 'aceb hâle geldim

Ol dost açdı gözümü gösterdi kendözümü

Gönlümdeki râzımı söyledim dile geldim

Gör ne yuvadan uçdum râzımı halka açdım

'Aşk tuzağına düşdüm tutuldum ele geldim

Tuzağa düşen gülmez 'âşıklar râhat olmaz

Söylerem dilim bilmez bir 'aceb ile geldim

Ben bunda geldim ise ilime geri gidem

Sanma ki bunda beni altûna mâla geldim

Değilem kâl ü kıylde bu yetmiş iki dilde

Hâlim ahvâlim nedir bu mülke sora geldim

Ne hâldeyim ne bilem tuzakdayım ne gülem

Bir garîbçe bülbülem ötmeğe güle geldim

Gül Muhammed deridir bülbül anın yâridir

Ol gül ile ezelî cihâna bile geldim

Mescidde medresede çok 'ibâdet eyledim

'Aşk oduna yanuban andan hâsıla geldim

Kudret sûret yapmadan feriştehler tapmadan

'Âlemi halk tutmadan ileri yola geldim

Yine Yûnus'a sordum eydür Hakk nûrun gördüm

İlk yaz güneşi gibi mevc urup doğa geldim

Yûnus Emre

Kuddise Sırruh