Anın Aşkı Gerek Bana Gerekmez Dünyâ Ukbâyı

5 Mayıs 2020 tarihinde yayınlanmıştır.

NUTK-İ ŞERÎF

Anın 'aşkı gerek bana gerekmez dünyâ 'ukbâyı

Ki 'aşkdır maksûdum ancak kodum cümle temennâyı

Muhabbet tadın ezelden kodu cânım dimağında

Kamudan el çeküp bu cân anup ister o Mevlâ'yı

Muhib mahbûb muhabbet bil hakîkatde bular birdir

Anınçün anı sevenler kodular külli sevdâyı

Anın derdini bilmeyen cihânda nesne bilmedi

Gerekse varsın ol yüz yıl okusun ağ u karaâyı

Anın 'aşkı kitabından şular kim okudu bir harf

Hep ismi resmi mahvoldu unutdu hep mâsivâyı

Ben ol şahbâz-ı kudsîyem kolundan uçdum ol şâhın

Şikârın sürüp götürdüm kim avladım bu sahrâyı

Avın aldım yine döndüm varup şâh koluna kondum

Cemâline bakup her dem ederim hoş temâşâyı

Ben ol serbâz-ı ünsîyem yolunda cân u bâş verdim

Bugün gördüm 'ayân anı kodum va'de-i ferdâyı

Şerâb-ı lâ-yezâlîden içüp hayrân u mest oldum

Sözüm mestâne anınçün ider nükte-i garrâyı

Niderem şol dili ben kim anın söylemeye râzın

Niderem şol gözü ben kim ki görmeye dilârâyı

Var Eşrefoğlu Rûmî sen bu râzı 'ârife söyle

Ki her bir bî-haber 'âmî ne bilsin bu ma'nâyı

Eşrefoğlu Rûmî

Kuddise Sırruh