Ârif-i Âgâh Olan Bîdâr Olur
14 Eylül 2021 tarihinde yayınlanmıştır.
NUTK-İ ŞERÎF
'Ârif-i âgâh olan bîdâr olur
Dost ile hem mahrem-i esrâr olur
Hamr-ı vahdetden olur mest-i müdâm
Hemdem-i Cânân olup huşyâr olur
Şevk eder her dem cemâl-i Yâr ile
Gâh olur ki mazhar-ı dîdâr olur
Cilveler eder demâdem Dost ile
Diledikçe vâsıl-ı dildâr olur
Mâlik olmuş ol vücûd iklîmine
Taht-ı dilde gâhîce hünkâr olur
Zevk eder dildâr ile şeb-tâ-seher
Her ne isterse gönülde vâr olur
Cân verip Cânân alırlar yerine
Sûk-ı dilde bir 'aceb bâzâr olur
Terk ederler dü cihânda vârını
Hakk ile bunlara özge kâr olur
Sâkî-i cân devr eder çün câmını
Bezm-i Hakk'da Sûzî çün demdâr olur
Ahmed Sûzî
Kuddise Sırruh