'Âşık İsen Ma'şûk İçün Şöyle Sen Merdâne Gel
11 Nisan 2019 tarihinde yayınlanmıştır.
NUTK-İ ŞERÎF
'Âşık isen ma'şûk içün şöyle sen merdâne gel
Şem'-i aşkı göricek pervâne gibi yâne gel
Da'vâ-yı bâtıl kıla mı tâlib-i Hakk ey 'aceb
Da'vâsız ma'nâ kılasın gel beru meydâne gel
Nice bir segbân olasın sohbet ü şâhın kanı
Meclisini ko bu nefsin sohbet-i sultâna gel
Ma'şûkun yolunda cân u bâşın terk eylegil
'Aşk şarâbın içüben mest olup hayrâne gel
Nice bir gözsüz hicâb ardında tâgî olasın
Çün ki İslâm zâhir oldu küfrü ko îmâne gel
Nice bir rencûr u mahcûr olasın gözsüz gibi
Çün tabîbin hâzık oldu derdin al dermâne gel
Sen vücûdun fânî kılmayınca bulmazsın bekâ
Vaslın ister isen anın cânı ko cânâne gel
Şems'e yoldaş olmak ister isen olgıl bî-mekân
Lâ-mekân sahrâsına anın ile seyrâne gel
Sultân Akşemseddîn
Kuddise Sırruh