Âşıkların Vücûdunu Aldı Hevâ-yı Hû
1 Mayıs 2024 tarihinde yayınlanmıştır.
NUTK-İ ŞERÎF
'Âşıkların vücûdunu aldı hevâ-yı Hû
Şûride kıldı anları zevk u safâ-yı Hû
Yakdı cihânı 'âşık-ı zârın inildisi
Bağrın delik delik ider anın çün nây-ı Hû
Yakın göründü 'âşıka ol ravza-yı safâ
Gösterdi doğru yolları çün kim hüdâ-yı Hû
Hükm etdi pâdişâh olup iklîm-i ma'nâda
Kondu anın ki başına zıll-ı hümâ-yı Hû
Şâd ol cemâli nûru ile sen de ey gönül
Gitdi gamın çü zulmeti geldi ziyâ-yı Hû
Câhil sanır bu sohbeti bir kuru hây hûy
Bilmez zamîrin eylemez ircâ'-ı hây-ı Hû
Meclisde nice 'âşıkı yaksa 'aceb midir
Kaldırdı çün ki perdeyi Nûrî likâ-yı Hû
Şeyh Abdülehad Nûrî
Kaddesallahu Sırrahu'l-Âlî