Aşk Hâletiyle Dâima Mestâneyim Hayrâneyim
31 Ocak 2019 tarihinde yayınlanmıştır.
NUTK-İ ŞERÎF
'Aşk hâletiyle dâima mestâneyim hayrâneyim
Ma'şûkumu efkâr ile nîrâneyim tâbâneyim
Bu derd ile mihnet-güzâr olmakdayım bî-ihtiyâr
Dil oldu bir mihre şikâr pervâneyim sûzâneyim
Olmakda hâlim çâk çâk etmez hayâlin infikâk
Râhında sînem oldu hâk târâneyim vîrâneyim
Dilde enîs subh u mesâ 'aşk oldu âteştden gıdâ
Etmekdeyim dâim nidâ efgâneyim giryâneyim
Çekmekdeyim her dem çile endûh u gam doldu dile
Bil âteş-i nârın ile gamhâneyim külhâneyim
Hüsn ü cemâl tuğrâsını gördükçe cân Leylâ'sını
'Aşkın hayâl sahrâsını seyrâneyim dîvâneyim
Selb oldu zevk u râhatım mahv oldu sabr u tâkatım
Her ân ile her sâ'atim devrâneyim nâlâneyim
Sâmî o kenz-i akdeme erince düşdü bir deme
Cânân içün dü 'aleme hicrâneyim bîgâneyim
Şeyh Abdurrahmân Sâmî Saruhânî
Kaddesallahu Sırrahu'l-Âlî