Aşk İle Mamûr Oldu Çün Rûz-i Ezel Dilhânesi
6 Ağustos 2021 tarihinde yayınlanmıştır.
NUTK-İ ŞERÎF
'Aşk ile ma'mûr oldu çün rûz-i ezel dilhânesi
Simurg-ı Kâf kadrine oldu muhabbet lânesi
******* ****** **** **** **** ***** **** **** *****
Açıldı çün bezm-i elest devreyledi peymânesi
Andan içenler oldu mest ayılmadı mestânesi
Bir bezm-i âlîdir o kim âkilleri bî-hûş ider
Kûy-i harâbâta düşüp seccâdesin ber-dûş ider
Bî-dilleri gûyâ kılup gûyâları hâmûş ider
Ol bâdeden kim nûş ider içdiği dem serhoş ider
Deryâ gibi ol cûş ider esrik olur dîvânesi
'Âşık odur bîm itmeyüp 'aşk âteşine cân atar
Hâk-i vücûdun mahv idüp nûr-i tecellâya batar
Sermâyeden sûd istemez varlığını yoğa satar
Savm-ı sivâyı kim tutar 'ıyd-i visâle ol yeter
Bülbül gibi dâim öter gülşen olur kâşânesi
Kadre irem dersen eğer ey sâlik-i merd-i hüner
Ehl-i riyânın her günü savm-ı firâk ile geçer
Bî-dâr olub encüm gibi yumma gözün şeb tâ-seher
Bayrâma ol 'âşık irer kim Hakk cemâlin görür
Dost bezminin zevkin sürer pür-nûr olur dil-hânesi
Bir şeyh-i 'âlî-himmetin su gibi ayağına ak
Kanlar akıtsın gözlerin şâm u seher hemçûn şafak
Ol mürşid-i kâmil ne der bir dem Sipâhî tut kulak
Aç gözünü Hakk ile bak oku Hüdâyî'den sebak
Kâmil olurmuş ehl-i Hakk doğmazdan evvel ânesi
Azîz Mahmûd Hüdâyî Hazretlerinin nutk-i şerîfi üzerine Sipâhî Efendi'nin tahmîsidir. İlk bendin bir mısraı maalesef tesbit edilememişdir.