Aşkdır Nahl-i Bâğ-ı Lem Yezelî
3 Şubat 2021 tarihinde yayınlanmıştır.
NUTK-İ ŞERÎF
'Aşkdır nahl-i bâğ-ı lem yezelî
Herkesin ol nihâle ermez eli
'Aşkdır bezm-i cânda şem'-i celî
Oldu pervânesi gönül göreli
'Aşkdır neşve-güster-i ezelî
Anı nûş etmedir 'uşşâk emeli
'Aşk etdi vücûdumu ifnâ
'Aşk mülk-i derûna çekdi livâ
'Aşkdır eyleyen dili şeydâ
'Aşkdır câna bâ'is-i gavgâ
'Aşkdır neşve-güster-i ezelî
Anı nûş etmedir 'uşşâk emeli
'Aşkdır hasbihâl-i her bî-dil
'Aşkdır cân-ı zâre ser-menzil
Dili 'aşk etdi böyle pâ der-gil
Cânı cânâne aşk eder vâsıl
'Aşkdır neşve-güster-i ezelî
Anı nûş etmedir 'uşşâk emeli
'Aşkdır düşdüm şikeste-hâl oldum
Derd-i 'aşk ile bî-mecâl oldum
Pûte-i 'aşk içinde kâl oldum
Feyz-i aşk ile pür-kemâl oldum
'Aşkdır neşve-güster-i ezelî
Anı nûş etmedir 'uşşâk emeli
Nâgehân dilde 'aşk oldu peydâ
Verdi mir'ât-ı câna 'aşk cilâ
Dil ü cân 'aşkdan olur mu cüdâ
'Âşıkım 'âşıkım Mecnûn-âsâ
'Aşkdır neşve-güster-i ezelî
Anı nûş etmedir 'uşşâk emeli