Âteş-i Gayret Vücûdum İçre Sûzân Bir Yana
11 Ocak 2022 tarihinde yayınlanmıştır.
NUTK-İ ŞERÎF
Âteş-i gayret vücûdum içre sûzân bir yana
Nâr-ı hasret kalb-i vîrânımda pinhân bir yana
Ten-güzârân bir yana hayrân-dil ü cân bir yana
Baş-ı galtân bir yana a'zâ-perîşân bir yana
Nûr-i vechin pertevin salmazsa o Hayru'l-beşer
Muntazam olmaz bu 'âlem bir dahi gitdi gider
Birbirinin zıddıdır şimdi muhâlif devr ider
Çarh-ı gerdân bir yana dûlâb-ı devrân bir yana
Zulm ile rüşvet ile pür oldu çün rûy-i zemîn
Gâyet ile müşkil oldu intizâm-ı emr-i dîn
Şath-ı tâmât ile yüz bin laf urur her bî-yakîn
Za'f-ı îmân bir yana da'vâ-yı merdân bir yana
Milk-i dîni bir alay bî-dîne taksîm etdiler
Cem' olup bünyâd-ı dîni hedme terkîm etdiler
Emr-i tedbîri biraz oğlana teslîm etdiler
Meyl-i sıbyân bir yana maksûd-i pîrân bir yana
Ref'-i şer'-i Ahmedîye kasd edince kâdıyân
Kasr-ı dîni yıkmağa şart eyledi Osmâniyân
Bahr-i gaflet içre gark oldu kamu halk-ı cihân
Gitdi mîzân bir yana âyât-ı burhân bir yana
Kişver-i İslâm olup zulm âteşiyle pür-şerer
Her tarafdan halk-ı 'âlem çağırır "eyne'l-meferr"
Saltanat muhtell olupdur cümle yârân bî-haber
Emr-i sultân bir yana ashâb-ı tuğyân bir yana
Dîdeler hûnbâr olup ağlar re'âyâ zâr zâr
Etdi vahşîler gibi her biri seyr-i kûhsâr
Bahr ü berrde fitne vü âşûb oldu âşikâr
Zulm-i buldân bir yana ahvâl-i 'ummân bir yana
Rah-ı şer'i terk edüp billah 'ısyân etdiler
Dâr-ı İslâm'ın esâsın cümle vîrân etdiler
Şer'i tebdîl eyleyüp kânûna tuğyân etdiler
Ehl-i dîvân bir yana ahkâm-ı Kur`ân bir yana
Yâ Resûlallah meded 'âlem harâb oldu harâb
Lutf u ihsân u mürüvvet eyle olsun feth-i bâb
Yanlarında Nûriyâ mensûha dönmüşdür Kitâb
Şimdi insân bir yana takvâ vü îkân bir yana
Şeyh Abdülehad Nûrî
Kaddesallah Sırrahu'l-Âlî