Ay Yüzünden Mazhar-ı Envâr-ı Îmân Olduğum

26 Ağustos 2019 tarihinde yayınlanmıştır.

NA'T-I ŞERÎF

Ay yüzünden mazhar-ı envâr-ı îmân olduğum

Ey edüp ümmîd-i lutfun şâd u handân olduğum

Ey kemâl-i şefkatinden 'afv-ı cûyân olduğum

Ey ki derdinden şifâ-bahş-ı dil ü cân olduğum

Ey ki tîğ-i çeşm-i "mâ zâg"ına kurbân olduğum

Görme lâyık hûn-i hasret içre galtân olduğum

Gurre-i 'ıyd-ı şeref destinde şemşîr-i celîl

Lîk eyler âb-ı hızr-ı câvidân-ı selsebîl

Teşnedir bî-şübhe bu zebh ü fedâya Cebraîl

Cân vermek sana cân-bahş olmağa billah delîl

Ey ki tîğ-i çeşm-i "mâ zâg"ına kurbân olduğum

Görme lâyık hûn-i hasret içre galtân olduğum

Rûz-i haşr olup yarın geldikde bu hâl üzre ben

Gâh güle gâh ağlaya bî-ihtiyâr elbet gören

Dil peşîmân ü zebân nâlân ü sîne pür-mihen

Bir nigehle ol zamân şâd eyle bu nâçârı sen

Ey ki tîğ-i çeşm-i "mâ zâg"ına kurbân olduğum

Görme lâyık hûn-i hasret içre galtân olduğum

Cân seni özler hevâ Gâlib gönül vahşet taleb

Dest-i efsûs oldu bu hayretle bana rûz u şeb

Cürm ile oldum huzûr-ı devletinde bî-edeb

Rahm kıl 'ısyânıma edüp nazar etme gadab

Ey ki tîğ-i çeşm-i "mâ zâg"ına kurbân olduğum

Görme lâyık hûn-i hasret içre galtân olduğum

Gerçi küstâh ü günehkâr ü heme kârı ziyân

Es'ad'ından zerre-i lutfun dirîğ etme amân

Na't-hânındır sezâ mı ede dûzahda figân

Eşk-i hasret başdan aşdı hasta gönlüm doldu kân

Ey ki tîğ-i çeşm-i "mâ zâg"ına kurbân olduğum

Görme lâyık hûn-i hasret içre galtân olduğum

Şeyh Gâlib el-Mevlevî

Kuddise Sırruh