Ayağın Bezm-i Kesretden Fenâ Ehli Çeker Bir Gün
29 Aralık 2023 tarihinde yayınlanmıştır.
.jpg)
NUTK-İ ŞERÎF
Ayağın bezm-i kesretden fenâ ehli çeker bir gün
Bu mergin sâgar-ı serşârını âhir içer bir gün
Otağın ref' edüp sultân-veş sahrâ-yı dünyâdan
Bu menzilde ikâmet etmez 'ukbâya göçer bir gün
Yâ zâğ olmuş yâ bülbül âşiyân-ı bâğ-ı fânîde
Karâr etmez fenâda semt-i bâkîye uçar bir gün
Kabâ olmuş bu halkın giydiği yâhud abâ olmuş
Kefenden üstüne dest-i ecel hulle biçer bir gün
Lebi hâkî görüp dem-beste hergîz söylemez sanma
Anın huffâr-ı kabr ağzın külünk ile açar bir gün
Ne denli Hakkıyâ polad olursa cism-i eflâkin
Kazâ sehmi anın da çenberinden bak geçer bir gün
İsmâil Hakkı Bursevî
Kaddesallahu Sırrahu'l-Âlî