Bâğ-ı Dilde Menzil Almış 'Aşk-ı Hakk

8 Şubat 2018 tarihinde yayınlanmıştır.

NUTK-İ ŞERÎF

Bâğ-ı dilde menzil almış 'aşk-ı Hakk 

Mekteb-i 'irfân kapusun eyle dakk

İster isen ilm-i vahdetden sebak

Nâr-ı 'aşka mâsivâyı cümle yak 

Perde-i imkânı kaldır Hakk'a bak

Tâ'at üzre geldi cümle kâmilân 

Verdi vârın işbu yolda 'âşıkân

Bulmak istersen hayât-ı câvidân 

Nâr-ı 'aşka mâsivâyı cümle yak 

 Perde-i imkânı kaldır Hakk'a bak

Câm-ı 'aşkı nûş idenler tâ ezel 

Mülk-i lâ-yefnâyı buldu bî-bedel 

Tâlib isen şevk ile meydâna gel 

Nâr-ı 'aşka mâsivâyı cümle yak 

 Perde-i imkânı kaldır Hakk'a bak

Menzilindir Mahviyâ şehr-i fenâ

Geç fenâdan bul bekâ ender bekâ 

Matlabınsa hâsılı nûr-i likâ 

Nâr-ı 'aşka mâsivâyı cümle yak 

 Perde-i imkânı kaldır Hakk'a bak

Îsâ Mahvî

Kuddise Sırruh