Bâş u Cân Verüben Yerine Aldım Tâze Cân
26 Ağustos 2023 tarihinde yayınlanmıştır.
NUTK-İ ŞERÎF
Bâş u cân verüben yerine aldım tâze cân
Bir bâzâr etdim ki olmaz böyle bâzâr-ı cihân
Günde bin kez kapusuna varsa sâil hoş gelir
Böyle bir zât-ı kerîmdir misli yokdur dü cihân
Nice bin cân olsa versem gam değil bir lutfuna
Zîrâ her bir demde olur nice bin lutf u ihsân
Her ne kadar 'ayb u kusûr cürm ü noksân olsa ger
Cümlesini 'afv ider dersen hulûsâne amân
Günde yetmiş kez dönersen yine var sen dergâha
'Azm ü cezm ile idersen tövbe red olmaz hemân
Bunca noksân vâr iken yine verir erzâkını
Kat' etmez başa kakmaz sana etmez imtinân
Böyle ekrem dahi erham dahi settâre'l-'uyûb
Dahi gaffâre'z-zunûb eyle iz'ân u 'irfân
Hamdülillâh olmuşuz bende bu zât-ı pâke biz
Şükr ü hamd ile idelim bin sipâs her zamân
Vâr ise sende basîret Sûzî durma rûz u şeb
Yüzünü yerlere sürüp gâfil olma zerre ân
Ahmed Sûzî
Kuddise Sırruh