Başıma Geldi Benim Bir Derd ki Hiç Dermânı Yok
16 Ekim 2021 tarihinde yayınlanmıştır.
NUTK-İ ŞERÎF
Başıma geldi benim bir derd ki hiç dermânı yok
Olmışam bîmâr ü nâçâr sıhhatin imkânı yok
İdemez Lokmân Hekîm olsa dahi ana 'ilâç
Bu sözüm gerçek-durur kardaş inan yalanı yok
Gülşen-i dîdârı 'âbid çün temâşâ etmemiş
Bildiği oruç namâz hac âhı yok efgânı yok
Derd imiş dermânı derdin derdsize derler himâr
'Ucb ile dolu içinde âteş-i sûzânı yok
Derd-i 'aşkdır dediğim her kişiye olmaz nasîb
Bir mübârek tuhfe kim haybet ü hüsrânı yok
Mürşid-i kâmil bu 'aşka insân arar irşâd içün
Nice bin hayvân gezer içinde bir insânı yok
Ehl-i 'aşk olmağa himmet eyle sen de kendine
'Aşkı olmayanların vâr cismi lâkin cânı yok
'Âşıkın artar yakîni 'aşkı oldukça mezîd
Her kimin yokdur yakîni dîni yok îmânı yok
Yok imiş 'aşka nihâyet kimse bilmez haddini
Bir ulu deryâdır ol kim haddi yok pâyânı yok
Dürr ü mercân bahr-i a'zamda bulunur bî-gümân
Bahr-i asgardan ne hâsıl dürrü yok mercânı yok
Bahr-i a'zam 'ilm-i bâtın dürr ü mercân ma'rifet
Bahr-i asgar 'ilm-i zâhir ehlinin 'irfânı yok
Der isen ki ben bu 'aşkı nice tahsîl edeyim
Ne alınır ne satılır sevki yok dükkânı yok
Benzemez zâhir işine ki te'allüm oluna
Hocası yok mektebi yok meclis ü meydânı yok
'İlm-i zâhir kesb ile hâsıl olur hirfet gibi
'Aşk bilinmez kesb olunmaz ismi mevcûd sânı yok
Bu su'âlin vereyim cevâbını sana işit
Tâlib-i sâdık erer matlûbuna hırmânı yok
Tanrı'sını isteyen bulur denir dilde mesel
Sıdk ile 'aşk isteyen bulmaz mı hey iz'ânı yok
Ol kadar iksâr-ı zikr et ki münâfıklar sana
Diyeler mecnûn mürâî 'aklı yok erkânı yok
Katre katre gönlüne deryâ gibi 'aşk dola tâ
Diye nâs erbâb-ı 'aşk içre anın akrânı yok
Buldu taklîd ile Kuddûsî bu 'aşkı çünki ol
Bir mukallid idi ki hiç 'ilmi yok ferzânı yok
Ahmed Kuddûsî
Kuddise Sırruh