Bed-mâye Olan Kimsede Hüsn-i Edeb Olmaz
10 Mayıs 2022 tarihinde yayınlanmıştır.
MÜSTEZÂD
Bed-mâye olan kimsede hüsn-i edeb olmaz
Olmaz gözüm olmaz
Da'vâ-yı neseb etse de sâhib-neseb olmaz
Olmaz gözüm olmaz
'İzz ü şerefi gerçi verir Hâlık-ı ahkem
Sa'y etme de elzem
Esbâba teşebbüsle olur bî-sebeb olmaz
Olmaz gözüm olmaz
Sa'y etmeli tahsîl-i kemâlâta ta'able
Ahlâk u edeble
Kesb-i hüner ü feyz-i cihân bî-te'ab olmaz
Olmaz gözüm olmaz
Sahra-yı temeddünde gerek sür'at-i ikdâm
Bî-gaflet ü ârâm
Ol bâdiyede ukde-i pâyi taleb olmaz
Olmaz gözüm olmaz
Müstağrak olur nûr bilâd-ı medeniyyet
Kalmaz gam-ı zulmet
Ma'mûre-i firdevs-i mu'allâda şeb olmaz
Olmaz gözüm olmaz
İksîr-i 'ulûma çalışup merd-i Hudâ ol
Bî-havf ü recâ ol
Merdân-ı Hudâ mâil-i îsm ü zeheb olmaz
Olmaz gözüm olmaz
Ehl-i hasebin kadri olur herkese ma'lûm
Ammâ bu da meczûm
Bî-terbiye âdemlere nef'-i haseb olmaz
Olmaz gözüm olmaz.
Etdirdi bu şeb encümene sôfî-i hâmûş
Her zevki ferâmûş
Bir evde ki mevtâ ola şevk ü tarab olmaz
Olmaz gözüm olmaz
Bîgâne-i envâr-ı safâ etdin Emîrî
Lâyık mı zamîri
Gevherde cilâ olmaz ise müntahab olmaz
Olmaz gözüm olmaz
Ali Emîrî Efendi
Rahmetullahi aleyh