Bedenden Geçmişem Ben Câna Geldim
12 Haziran 2023 tarihinde yayınlanmıştır.
NUTK-İ ŞERÎF
Bedenden geçmişem ben câna geldim
Kemâl-i sırr ile insâna geldim
Bi-hamdillâh bugün buldum makâmım
Soruban ma'nâsın Kur`ân’a geldim
Dile gelmez desem yârin visâlin
Gönül tahtındaki Sultân'a geldim
Cemâl-i vaslının buldum visâlin
İçinde katrenin 'ummâna geldim
Görünmez sîreti beşer gözüyle
Fenâ mülkündeki vîrâna geldim
İnanırsan sana verem cevâbı
Gönül bâğındaki seyrâna geldim
Bu imiş 'âşıka ma'şûk nişânı
Ne gam şimden geri 'ayâna geldim
Kılaldan tâ'ati hakka'l-yakînden
Anınçün defter-i dîvâna geldim
Muhabbet ma'nâsı câna düşelden
Başım top eyleyip meydâna geldim
Bu cismim cehlini fehm etdi cânım
Anı yakmaklığa külhâna geldim
Eğer bildin ise remzin rumûzun
Hakk'ın lutfundaki ihsâna geldim
Hakk'ın zikri hidâyetdir dilime
Ne gam şimden geri handâna geldim
Görürsen Vâhibî fi'lini 'aşkdan
Cemâl-i şevkine devrâna geldim
Erişdi cânıma sırdan hidâyet
Yanılmadım yolum Rahmân'a geldim
Benim keyfiyyet-i hâlim sorarsan
Şarâb-ı şevk ile mestâne geldim
Cihânı seyr edip geldim gönülden
Bu 'aşk içindeki destâna geldim
Sana söyler hitâb eyler Vehâbî
Bu halka rahm eden Rahmân'a geldim
Abdülvehhâb Ümmî
Kaddesallahu Sırrahu's-Sâmî