Benim İşbu Garîb Cânım Aceb Düşdü Bu Sahrâya
6 Kasım 2021 tarihinde yayınlanmıştır.
NUTK-İ ŞERÎF
Benim işbu garîb cânım 'aceb düşdü bu sahrâya
Yolunu Dost'a iltmeğe dolaşdı işbu sevdâya
Meğer bu cân bu sevdâyı ezelden tuta geldiydi
Yine ol Dost'a varmağa bunu edindi sermâye
Bu sevdâ bir 'aceb sevdâ getirir bâşıma gavgâ
Nicenin tâc ü tahtını bu sevdâ verdi yağmâya
Bu sevdâ dediğim 'aşkdır bu sahrâ dediğim dünyâ
Bu sahrâda bu esfelden bu 'aşkdır ilten a'lâya
Niceler işbu sahrâda yolun yabana bırakmış
Vatanından cüdâ düşmüş doluşmuş bu harâbâya
Velî her sevdâ 'aşk olmaz 'âşıklar diridir ölmez
Ölen şol kimselerdir kim gönül verdi şu dünyâya
Bu 'aşkı Hakk bu cânlara delîl olmağa gönderdi
Bulan 'aşk odun 'aşk ile hakîkat erdi Mevlâ'ya
Gel imdi sen de bul 'aşkı ki bunda göresin Dost'u
Görenler muntazır olmaz bugün ol Dost'u ferdâya
Sen ey gönlü kara münkir gider inkârı içinden
Dîdârım görmeyiser der Hakk ol münkir-i a'mâya
Eğer dersen ki 'âşıkam bu 'aşk yolunda sâdıkam
Budur bu da'vâya ma'nâ koyasın cânı ortaya
Eşrefoğlu Rûmî sen bu 'aşkdan hergiz ayrılma
Bu 'aşk cûşiyledir katre taşup vardığı deryâya
Bu 'aşk bir derd âhıdır gidenin Hakk'a râhıdır
Bu 'aşka berk yapış zinhâr kayıkma dünyâ vü ukbâya
Eşrefoğlu Rûmî
Kuddise Sırruh