MuzafferOzak.com (Türkçe)

Ey nihâl-i çemen-ârâ-yi edeb

Nûr-bahşâ-yı dil ü dîde-i eb

Sa'y kıl 'ilm-i şerîfe şeb ü rûz

Kalma hayvân-sıfat ol 'ilm-âmûz

'İlme sa'y eylememekden hazer et

'İlm ü sa'y ikisi birdir nazar et

Müdde'âma bu suhan şâhiddir

'İlm ü sa'yin 'adedi vâhiddir

Bulamaz 'ilm bilâ-sa'y vücûd

Biri gitse biri olur nâ-bûd

Sıfat-ı Hazret-i Mevlâ'dır 'ilm

Cümle evsâfdan a'lâdır 'ilm

Taleb-i 'ilme çalış ol a'lem

Farzdır dedi Resûl-i Ekrem

Dahî emr eyledi ol sâhib-i 'ilm

"Mehdden lahde dek ol tâlib-i 'ilm"

'İlm içün oldu şeh-i hıtta-i nûr
"Rabbi zidnî" talebiyle me'mûr

Bulagör öyle Medîne'ye vusûl

Ki kapusu ola dâmâd-ı Resûl

'İlmdir mâşıta-i rûy-ı vücûd'İlmdür vâsıta-i bûd ü ne-bûd
'İlmdir mâide-i Rabbânî 'İlmdir mevhibe-i Yezdânî
'İlmdir râbıta-i 'izz ü 'ulâ'İlmdir bâ'is-i temkîn-i safâ
'İlmdir zâbıta-i câh u celâl'İlmdir râbıta-i birr ü nevâl

'İlm bir lûcce-i bî-sâhildir

Anda 'âlim geçinen câhildir

Cehle Hakk mevt dedi 'ilme hayât

Olma hem-hâl-i gürûh-ı emvât

Olma mahrûm-ı hayât-ı ebedî

'İlm ile fark edegör nîk ü bedî

'İlmin envâ'ı ile ol hâli

Belki lâzım gele isti'mâli

Bilmek elbette değil mi ahsen

Sorsalar ben ânı bilmem demeden

Hazretin nâsa budur telkîni

"Utlubü'l-'ilme velev bi's-sîni"

Etme 'âr öğren oku ehlinden

Herşeyin 'ilmi güzel cehlinden

Cühelâ 'âlime nisbet hardır

Belki hardan da bile bedterdir

Kandedir bî-haber ü kande habîr

Mütesâvî değil a'mâ vü basîr

Ne kadar bulsa da ferr ü şevket

Câhile câh ile gelmez rıf'at

Cehldir mâye-i şerm ü haclet

Cehldir mûris-i zill ü nahbet

Cehldir âdeme zindân-ı belâ

Ki düşenler göremez rûy-ı rehâ

Cehldir mahz-ı 'adem 'ilm vücûd

Hiç berâber mi olur bûd ü ne-bûd

Olmaya 'ilm kadar emr-i bülend

'İlmden görmedi hîç kimse gezend

Ger re'âyâ vü gerek sâhib-i tâc

Lâbüd olur 'ulemâya muhtâc

Şeref-i 'ilme nihâyet yokdur

Sıfat-ı Bâri'ye gâyet yokdur

Olmayınca mütenâhî ma'lûm

Mümkin olur mı tenâhî-i 'ulûm

Kalma kışrında 'ulûmuñ ammâ

Olagör vâsıl-ı lübb-i ma'nâ

Zâhirin bâtınına eyle 'ubûr

Yek perle uçabilsin mi tuyûr

Hânenin zâhiridir cây-ı güzâr

Halvet-i bâtınıdır cây-ı karâr

Sâhil-i bahrda olsun mı le'âl

Gevher istersen eğer ka'rına dal

Urfalı Nâbî

Rahmetullahi Aleyh

Beşikden Mezara Kadar İlim