Bî-misâl Allah Eder İhsân İhsân Üstüne

15 Temmuz 2020 tarihinde yayınlanmıştır.

NUTK-İ ŞERÎF

Bî-misâl Allah eder ihsân ihsân üstüne

Derdlinin her derdine dermân dermân üstüne

Cümleye ihsân ü lutfu bî-hisâb u bî-kıyâs

Cân u dilden farz olur şükrân şükrân üstüne

Taht-ı dilde şâh-ı hüsn ü ân ü şânı bir bilen

Cânı rağbet eylemez cânân cânân üstüne

Nev hilâl-i 'ıyd-i vuslat muhsine ihsân olup

Cân olur bî-ihtiyâr kurbân kurbân üstüne

Rûh-i düşvârı esîr-i zülf ü ebrû eyleyüp

Bahr-ı hayret mevc eder hayrân hayrân üstüne

Doğdu ol nûr-i ezel âfâk-ı eflâk-i dile

Bârik-i envârı hep lem'ân lem'ân üstüne

Zulmet-i nâr-ı cahîm hicrân-ı zevâle yüz tutup

Eşkim akdı sel gibi bârân bârân üstüne

Bende-i meftûnuyum ben tâ ezelden tâ ebed

Râzıyım her emrine fermân fermân üstüne

Mushaf-ı âyât-ı hüsnün seyr eden bî-ihtiyâr

Sıdk ile ikrâr eder îmân îmân üstüne

Sâmiyâ iklîm-i dilde hükm eden cânân bir

Olmadı bir mülkde hiç sultân sultân üstüne

Şeyh Abdurrahmân Sâmî Saruhânî

Kaddesallahu Sırrahu'l-Âlî