Bihâr-ı Rahmete Nisbet Kulun Zenbi Değil Katre
29 Ağustos 2023 tarihinde yayınlanmıştır.
MÜNÂCÂT
Bihâr-ı rahmete nisbet kulun zenbi değil katre
Bu şems ile kamer nûru cemâlinden değil zerre
Ferâgat mülküne sultân olupdur 'âşık-ı vaslın
'Aceb mi ser-fürû etmezse anlar mâlik-i şehre
Şehâ ger zerre lutfundan ererse aç u miskîne
Gınâya yüz tutup dâim ebed ol istemez behre
Senin bahr-i visâlinden tamlarsa katre 'atşâna
Ne mümkün iltifât ede bu 'ummânda akan nehre
Tezellül birle yüz sürüp eşiğin bekleyen kıtmîr
Mu'azzez tâc u taht ile mükerrem şâh olur 'asra
Kitâb-ı vasf-ı hüsnünden okuyan bir varak şâhım
Olup müstağnî 'allâme ne hâcet fıkh u tefsîre
Denizler katresince ger ederse zâhidân haccı
Değişmez bir tavâfına ser-i kûyin kılan 'umre
Visâlin haccın edersem o günde hacc-ı ekberdir
Kabûl etse kılam kurbân bu cânı günde bin kerre
Zülâl-i çeşme-i kûyin bulup nûş eyleyen bir kez
Değil âb-ı hayât ancak baş eğmez zemzem-i bi're
Ekenler mezrâ-ı dilde muhabbet tohmunu billâh
Savurup harmân-ı cevher devşirir dâne-i dürre
Efendim kapuna geldi fakîrin Sûzî sâildir
Kabûl eyle niyâzını gidüp el açmasın gayre
Ahmed Sûzî
Kuddise Sırruh