Bildim Bileli Masdar-ı Feyyâz-ı Bekâyı
9 Ağustos 2021 tarihinde yayınlanmıştır.
NUTK-İ ŞERÎF
Bildim bileli masdar-ı Feyyâz-ı bekâyı
Esrâr-ı Hudâ’yı
Terk etdi gönül debdebe-i mülk-i fenâyı
Esbâb-ı cefâyı
'Ârifdir olan neş'e-i 'ulyâ ile cûşân
Raksândır o her ân
Ancak o bilir nükte-i "illâ" ile "lâ"yı
Keşfetdi 'amâyı
Mihrâb-ı cihân ahsen-i takvîm-i Hudâ'dır
Ta'zîme revâdır
Hûşumdaki gûşumla işit sen bu nidâyı
Fehmeyle hafâyı
'Uşşâk-ı Hudâ sînedeki bülbüle hayrân
Her nağmesi 'irfân
Tevhîd ile çınlatdı bütün arz u semâyı
Mest etdi safàyı
Eşyâ ki ezel mevcesidir sahn-ı fezâda
Hep 'aşk-ı Hudâ'da
Bul aslını tetkîk ile kalb-i 'urefàyı
Âyât-ı Hudâ'yı
Âyât-ı Hudâ sînede mestûr-ı ezeldir
Halli ne güzeldir
Bil Tûr-ı vücûdundaki vâdî-i Tuvâ'yı
Hallâk-ı kuvâyı
Cibrîl ile kalmak ne revâ Sidre'de mebhût
Matlûb ise lâhût
Refref ile bul sırr-ı hüveydâ-yı 'ulâyı
Keşfeyle gıtâyı
Nûr oldu cihân ben okudum Âyet-i Nûr'u
Mişkât-ı zuhûru
Bildim ne imiş kalbe doġan şems-i duhâyı
Gördüm o zıyâyı
Kalbim dil-i ra'nâ gibi sermest-i hakîkat
Mecdî ne sa'âdet
Tekrâr ederim subh u mesâ hamd u senâyı
Bildim o Hudâ'yı
Abdülaziz Mecdî Efendi
Kuddise Sırruh