Bir Kârbân Kopmuş Ezel-i Âzâlden
24 Şubat 2023 tarihinde yayınlanmıştır.
NUTK-İ ŞERÎF
Bir kârbân kopmuş ezel-i âzâlden
Bir kapıdan gelir birinden gider
Emr olunmuş ezel o lem yezelden
Bir kapıdan gelir birinden gider
Nice selâtînler tahtın üstünde
Nice Süleymanlar mühür destinde
Nice evliyâlar irşâd postunda
Bir kapıdan gelir birinden gider
Nice zülf-i sanem kemân-ebrûler
Nice mîr-i zemân meh-tâbân rûler
Nice serv-i revân nice meh-rûler
Bir kapıdan gelir birinden gider
Nice şehzâdeler şîrîn edâlar
Nice yüzbinlerce bây u gedâlar
Nice yüzbinlerce rûhu fedâlar
Bir kapıdan gelir birinden gider
Nice İskender nice Husrevler
Nice şehsüvârlar nice pîşrevler
Nice şeref-tâbân olan peyrevler
Bir kapıdan gelir birinden gider
Nice pîr ü civân emâne geldi
Nice yüzbin kâfir îmâne geldi
Her ne kadar devr-i zemâne geldi
Bir kapıdan gelir birinden gider
Er olanlar meydân aldı gitdiler
Merdâneler maksûduna yetdiler
Hakk yolunda servi gibi bitdiler
Bir kapıdan gelir birinden gider
Dünyâya meyl etmez ehl-i se'âdet
Hakk'dan ayrılır mı ehl-i hidâyet
Görürler Mevlâ'dan lutf u inâyet
Bir kapıdan gelir birinden gider
Ehl-i dünyâ bilmez ağ u karayı
Dâr-ı bekâ bilir dâr -ı fenâyı
Gönlünde görmemiş hubb-i Mevlâ'yı
Bir kapıdan gelir birinden gider
Lutfî bu 'âleme bâzâra geldin
Bu bâzârda derd-i hezâra geldin
Bir bak neye bu rehgüzâra geldin
Bir kapıdan gelir birinden gider
Alvarlı Efe Hâce Muhammed Lutfî
Kaddesallahu Sırrahu'l-Âlî