Bir Kez Yüzün Gören Senin Ömrünce Hiç Unutmaya

14 Nisan 2019 tarihinde yayınlanmıştır.

NUTK-İ ŞERÎF

Bir kez yüzün gören senin ömrünce hiç unutmaya

Tesbîhi sensin dilinde ayruk nesne eyitmeye

Tâ'atına duran zâhid nazarına irer ise

Tesbîhini unudup ol ayruk secde de itmeye

Ağzına şeker aluban gözleri sana tuş olan

Unuta şekerini ayruk çiyneyüben yutmaya

Görse yüzün nûrunun balkıdığını gelüp

Ayın on dördü gecesi senden sebak itmeye

Ben seni sevdiğim içün eğer bahâ derler ise

İki cihân mülkün verem dahi bahâsı yetmeye

İki cihân dopdolu bâğ u bostân olur ise

Senin kokundan iyi gül bostân içinde bitmeye

Gül ü reyhânın kokusu 'âşık ile ma'şûkadır

'Âşık olanın ma'şûku hergiz ögünden gitmeye

İsrâfil sûrun üricek mahlûkât durugelicek

Senin ününden artuk hiç kulağı işitmeye

Zühre yere inübeni sazın nüvaht eyler ise

'Âşıkın 'işreti sensiz gözü ol yana gitmeye

N'ider 'âşık hânumânı sensiz cihânı ya cânı

İki cihân fedâ sana kimesne gümân tutmaya

Sekiz uçmağın hûrîsi eğer bezenüp geleler

Senin sevginden özgeyi gönlüm hiç kabûl etmeye

Bu dünyâda ne ola kim âhiretde ol olmaya

Hûriyle gılmân gelicek 'âşık elin uzatmaya

Yûnus seni seveliden beşâret oldu cânına

Her dem yeni dirlikdedir hergiz ömrün eskitmeye

Yûnus Emre

Kuddise Sırruh