Bir Pâdişah İmiş Meselâ Cân Dedikleri
28 Haziran 2022 tarihinde yayınlanmıştır.
NUTK-İ ŞERÎF
Bir pâdişah imiş meselâ cân dedikleri
Taht olmuş ana ki bütün insân dedikleri
Derlerse ger hazîne kanı pâdişaha pes
Cânın hazînesi imiş îmân dedikleri
Etrâfın ol hazînenin üç kat hisâr ede
Sultânda vâr ise eğer iz'ân dedikleri
İç kal'ayı ferâiz ile eyleye binâ
Kim ana bulmaya zufr 'udvân dedikleri
Ola ikinci kal'a-yı binâ vâcibât ile
Ermeye tâ ki dest-i rakîbân dedikleri
Bünyâd ola üçüncü dahi sünnetân ile
Muhkem takayyüd eyleye sultân dedikleri
Hafr eyleye külünk-i edeb birle handekin
Gâfil olmaya ki geçmeye şeytân dedikleri
Tevhîd ü zikr ü savm edeb erkân u ma'rifet
Bunlardır ol hisâra nigeh-bân dedikleri
Zeyn eyleye silâh-ı 'ibâdetle çevresin
Dizdâr u kul ola edeb ü erkân dedikleri
Her kim bu resme hıfz ede îmân hazînesin
Tahkîk odur cihânda Süleymân dedikleri
Hıfz eyle imdi kal'a-i îmânı dâimâ
Merdâne ol ki geçmeye a'dâ-yı bed-likâ
Seyyid Osman Fazlî Efendi
Kuddise Sırruh