Biz Cân-ı Cihân u Cân-ı Cânız
24 Aralık 2022 tarihinde yayınlanmıştır.
NUTK-İ ŞERÎF
I
Biz cân-ı cihân u cân-ı cânız
Her yâne revân kimi revânız
Tenhâ teni sanma cân u dilden
Cânân kademine cân-feşânız
Bintü'l-'inebin müdâm hoş hoş
'Unnâb-ı lebin öpüp soranız
Biz mastabanın mücâviriyiz
Gerçi ki müsâfir-i cihânız
Sanman bizi nesne bilmeziz biz
Biz 'âlim-i nâ-nüvişte hânız
Seyr-i melekût içün cihânda
Biz anadan iki kez doğanız
Bakman bize siz inen dahı hâr
Biz bende-i şâh-ı bî-nişânız
Sûretde egerçi biz gedâyız
Ma'nâda velîk pâdişâhız
II
Biz gerçi ki tınmayup hâmûşuz
Sen sanma bizi ki bî-hurûşuz
Mutrib ne ki dir isen di hoşdur
Biz hak söze cümle gûş u hûşuz
Abdâl-ı keneb-hârız gehî biz
Geh pâk-tirâş u bâde-nûşuz
Geh cavlâkîyiz gehî kalender
Geh hayderî gâh post-pûşuz
Geh rind-i kumâr-bâz u nerrâd
Geh şâh-ı melâike cuyûşuz
Geh şîr-i peleng-efgeniz biz
Geh gürbe-i dehr elinde mûşuz
Geh Halvetî-i tarab-nümâyız
Geh Mevlevî-i safa-fürûşuz
Sûretde egerçi biz gedâyız
Ma'nâda velîk pâdişâhız
III
Biz geh megesiz gehî humâyız
Geh pâdişehiz gehî gedâyız
Geh hâce-i mün'imiz tüvân-ger
Geh müflis ü ac u bî-nevâyız
Geh ser-hoş u mey-perest ü kallâş
Geh rûze-güzâr u pârsâyız
Geh rûhun ilini ideniz geşt
Geh nefsin elinde mübtelâyız
Geh 'âciz u pes-rev ü fürû-ten
Geh şeyh-i şuyûh u pîşvâyız
Geh bir sözü söylemekde lâliz
Geh şûh u nedîm ü hoş-edâyız
Geh pür-keder ü hazîn ü gam-gîn
Geh hurrem u şâd u pür-safâyız
Sûretde egerçi biz gedâyız
Ma'nâda velîk pâdişâhız
IV
Biz geh hum-ı mey gehî sebûyuz
Geh kumkumayız geh kedûyuz
Zâhid kimi geh 'abûs-şekliz
Geh rind kimi küşâde-rûyuz
Geh sirke kabağı tek turş-rûy
Geh mey kabı kimi hoş-gülûyuz
Geh mâhî-i kulzümüz keşef-hâr
Geh ejder-i çegz-gîr cûyuz
Geh kurtulanız bu reng ü bûdan
Geh gâhî esîr-i reng ü bûyuz
Geh cimri vü hezl-gûy u şakrak
Geh vâ'iz-i pend ü nush-gûyuz
Geh ehl-i hıredden usluyuz biz
Gâhî deliden de biz deliyiz
Sûretde egerçi biz gedâyız
Ma'nâda velîk pâdişâhız
V
Biz mest-i harâb-ı çeşm-i yârız
Âşüfte-i kâkül-i nigârız
Kirpikleri kimi hûb-cem'iz
Geh turrası kimi târ u mârız
Geh rûz yüzüyle sâkiniz biz
Geh gice saçıyla bî-karârız
Geh hâcibi kimi pârsâyız
Geh la'li kimi şarâb-hârız
Geh zerre-tek ağzı ile hîçiz
Geh mihr-i ruhiyle mihr-vârız
Yâkûtu kimi gehî hamûşuz
Geh la'li kimi suhen-güdâzız
Ahbâb arasında hoş 'azîziz
A'dâ gözüne egerçi hârız
Sûretde egerçi biz gedâyız
Ma'nâda velîk pâdişâhız
VI
Biz mâye-i 'aşk ile ganîyiz
Sanma bizi müflis ü denîyiz
Her kim seve 'aşkı dostuyuz biz
Kim sevmese 'aşkı düşmeniyiz
Bî-'aşk olanda katı dûnuz
'Aşk ile velîk key senîyiz
Geh âh u figâne menba'ız biz
Geh hây ile hûy ma'deniyiz
Geh 'akl u hıred hazîne-dârı
Geh cevher-i 'aşk mahzeniyiz
Geh şevk şerâbına piyâle
Geh 'aşk nebîdinin deniyiz
Geh zulmetîyiz saçıyla yârın
Geh nûr-ı ruhiyle Rûşenîyiz
Sûretde egerçi biz gedâyız
Ma'nâda velîk pâdişâhız
VII
Biz 'aşk gamıyla şâd-kâmuz
Cândan şeh-i 'aşka hoş-gulâmuz
Çeküp başı 'akl-ı bî-hıredden
'Aşkın sözüne mutî' u râmız
'Aşk oduyla pişmişiz be-gâyet
Zâhid kimi sanma bizi hâmız
Nâmûs ile 'ârı salanız gâh
Geh beste-i 'âr u neng u nâmız
Yâd-ı ruh u zülfü içün nigârın
Hânende-i vird-i subh u şâmız
Geh zülf ü ruhiyle Rûşenî-vâr
Âşüfte-i şâm u deng-i bâmız
Geh 'aşk ile olanız suhen-gû
Zâhid kimi gâhi bî-kelâmız
Sûretde egerçi biz gedâyız
Ma'nâda velîk pâdişâhız
Dede Ömer Rûşenî
Kaddesallahu Sırrahu'l-Âlî