Biz Uludan İşitdik Evvel Er Yaradıldı

6 Ekim 2019 tarihinde yayınlanmıştır.

NUTK-İ ŞERÎF

Biz uludan işitdik evvel er yaradıldı

Pâdişâhın birliğin evvel kadîm er bildi

Bunca yıl bunca zamân biz işitdik bî-gümân

Çalap kendi sun'undan ere Tanrılık kıldı

Eydürler bir kuş idi hikmeti öküş idi

İki cihân 'ârifi ol kuşdan 'ibret aldı

Ol kuşun her bir yönü yüz bin yiğirmi dört bin

Evvel ol kuş uçuban rahmet gölüne daldı

Çün gölden geru döndü budak üzere kondu

Silkindi her bir yönden bir damla su döküldü

Ol suyun her birisin bir cân yaratdı güzin

Ol cânın her birisi bunda peygamber oldu

Evvelki bünyâd oldu altı kez dünyâ doldu

Yedincisi bu idi bu Âdem yaradıldı

Âdem toprakdan idi 'Azâzîl oddan idi

İşitdik 'Azâzîl'i Âdem'e bakdı güldü

Secde geldi Âdem'e eydür inin kademe

Cümle ferişte indi 'Azâzîl dura kaldı

Eydür ben oddan olam yüz bin yıl tâ'at kılam

Tapu buyuracağın tâ'atın 'arza kıldı

Ol halkın varlığından pâdişâh birliğinden

Şol bir söz sebebinden sürüldü la'net oldu

Her kim kendüyü gördü üstâdı İblîs oldu

Kişi ne buldu ise miskînlik ile buldu

Eksikliğim Hakk bilir 'aşkı bana ol verir

Kılgıl Yûnus'a tîmâr 'aşk beni benden aldı

Yûnus Emre
Kuddise Sırruh