Bizi Fazlıyla İnsân Eylemişdir
31 Mart 2020 tarihinde yayınlanmıştır.
NUTK-İ ŞERÎF
Bizi fazlıyla insân eylemişdir
Gör e lutfunu ol Rabb-i Kerîm'in
Yine hem ehl-i îmân eylemişdir
Gör e ihsânın ol Hayy ü Kadîm'in
Kalem olsa nebâtât ile eşcâr
Mürekkeb olsa deryâlarla enhâr
Yazılmaz ni'met-i Sultân-ı Gaffâr
Gör e lutfunu ol Rabb-i Kerîm'in
Ânın hükmündedir dünyâ vü 'ukbâ
Yed-i kudretdedir ednâ vü a'lâ
Uyan gafletden ol bir merd-i dânâ
Gör e lutfunu ol Rabb-i Kerîm'in
Bizi fazlıyla irgürdü hayâta
Delâlet etdi ef'âl ü sıfâta
Hidâyet eyledi envâr-ı zâta
Gör e lutfunu ol Rabb-i Kadîm'in
Olıcak bir kişide 'ilm ü 'irfân
Komaz ol sâhibin kim ede 'isyân
Yürü var Halık'a şükr eyle her ân
Gör e lutfunu ol Rabb-i Kerîm'in
Getirdi bizi fazlıyla vücûda
Dahi hem mazhar etdi lutf u cûda
Umarız irevüz nûr-ı şühûda
Gör e lutfunu ol Rabb-i Kerîm'in
Buyurur "in te'uddû ni'metallâh"
Olagör imdi bu ma'nâdan âgâh
Hüdâyî ni'mete şükr eyle her gâh
Gör e ihsânın ol Hayy ü Kadîm'in
Azîz Mahmûd Hüdâyî
Kaddesallahu Sırrahu'l-Âlî