Bu Aşk Bir Hâkim-i Cândır Ne Derd-i Bî-devâdır Bu
4 Nisan 2019 tarihinde yayınlanmıştır.
NUTK-İ ŞERÎF
Bu 'aşk bir hakim-i cândır ne derd-i bî-devâdır bu
Ezel mümtâzına bahşâyiş-i nûr-i Hudâ'dır bu
Bu 'aşk bir kenz-i Sübhân'dır ona sermâye dü 'âlem
Reh-i hakbîn olan 'âşıklara hep muktedâdır bu
Bu 'aşk cârî bütün 'âlemlerin zerrâtına sârî
Reh-i ma'şûkda vârın etdiren mahv u fedâdır bu
Bu 'aşkın serteser 'âlem esîr-i nâtüvânıdır
Kimi süflî kimi 'ulviyyet-i hâlet-edâdır bu
Bu 'aşk bir kudret-i Hakk'dır müsahhardır ona imkân
Umûr-i 'âlemîni sevka bâis ibtidâdır bu
Bu 'aşk 'ulvîde 'âlîdir makâmâtı meâlîdir
Mukarrebler nasîbi rûha rûhânî gıdâdır bu
Bu 'aşk bir da'vet-i Hakk halkı sevk eyler merâtibce
Ki emr-i "kün fekân"dan Sâmiyâ mahfî nidâdır bu
Şeyh Abdurrahmân Sâmî Saruhânî
Kaddesallahu Sırrahu'l-Âlî