Bu Cânım İçre Cânım Mustafâ'dır
18 Nisan 2022 tarihinde yayınlanmıştır.
NA'T-I ŞERÎF
Bu cânım içre cânım Mustafâ'dır
Gönül tahtında cânım Mustafâ'dır
Koyam mı dâmen-i lutfun elimden
Ki re's-i kârbânım Mustafâ'dır
Anın nûruyladır aynımda nûrum
Dahi vird-i zebânım Mustafâ'dır
Cefâsı gam değil ağyâr-ı hârın
Çü anda mihribânım Mustafâ'dır
Katârından umarım kesmeye Hakk
Ki hâlâ sârbânım Mustafâ'dır
'Aceb mi na'tine Hassân olursam
Ki dilde tercemânım Mustafâ'dır
Ne var ayrılmasam râh-ı Hudâ'dan
Bu dem dest-i inânım Mustafâ'dır
Tutupdur herkesi bir kimse mesned
Benim hırz-ı emânım Mustafâ'dır
Ne gam ger top koparsa leşker-i gam
Ki dilde şâd-mânım Mustafâ’dır
Kimi havrâ kimi hulleyle halkın
Benim zevk-i cinânım Mustafâ'dır
Umarım hûb ola mahşerde hâlim
Ki anda dîde-bânım Mustafâ'dır
Zarar mı veriser harr-ı kıyâmet
Şu kim dir sâyebânım Mustafâ'dır
Bu dem vîrânelikten kaçma Şemsî
Bu dem genc-i inânım Mustafâ'dır
Şemseddîn Sıvâsî
Kuddise Sırruh