Bu Dârât-ı Cihân Fânî Olupdur Sonra Nâ-mevcûd
1 Ocak 2021 tarihinde yayınlanmıştır.
NUTK-İ ŞERÎF
Bu dârât-ı cihân fânî olupdur sonra nâ-mevcûd
Bekâya meyl edelim gel ki bâkîdir olup mevcûd
Dilersen mülk-i câvidi gel imdi 'aşka mâlik ol
Kadîmîdir bekâsı pes ezelden tâ ebed mevrûd
Kıyâm-ı dü cihânın çün bu 'aşk ile olur dâim
Bu mahsûsât mevcûdât ki buldu 'aşk ile vücûd
Ki 'aşkın zerresinden nice bin zerrât olur zâhir
Zevâli hep mukarrerdir velâkin 'aşk olur mevcûd
Bu eşyâlar ne kim vardır kamu mir'ât-ı 'aşk olmuş
Görünen hem gören oldur ki olmuş şâhid ü meşhûd
Gel imdi kendini tanı bu 'aşkdan bir haberdâr ol
Vücûdun fâni kıl 'aşkda özün bâkî ola mes'ûd
Vücûdun hıfz eden kimse fenâya verdi pes gönlün
Ki nefs-i şevk-i şöhretdir bekâsı yok değil maksûd
Fenâya meyl eden fânî olur bâkî nedir bilmez
'Ubûdiyyetde kâimdir velî bilmez nedir ma'bûd
Basîret eylesen zâtın o zât-ı pâke mazhardır
Velî zâhir hevâsıyla edipsin kendini âlûd
Tecerrüd ile zâhirden teveccüh eyle dergâha
Bulursun mescidi dilde özün hem sâcid ü mescûd
Edüp hamd ü senâ her dem gönül gözün küşâd eyle
Hakîkatle nazar eyle olupsun hâmid ü mahmûd
Bu 'aşka mahrem olanlar olur bîgâne pes gayra
Ki 'aşkın şânıdır ma'şûkunun gayrı olur mechûd
İçüp 'aşk câmını Sûzî 'aceb medhûş ü mest olmuş
Ki 'aklı başına gelmez bu hâlâtı olur memdûd
Ahmed Sûzî
Kuddise Sırruh