Bu Derdimden İnler İdim Derdim Bana Dermân İmiş
17 Ağustos 2018 tarihinde yayınlanmıştır.
NUTK-İ ŞERÎF
Bu derdimden inler idim derdim bana dermân imiş
Bî-derd olan kimselerin dek adı müslümân imiş
Bî-derd olan insân değil hiç ameli olmaz kabûl
Derdsiz kişi bu âlemde bir yularsız hayvân imiş
Hayvân deme insân deme hergîz yaramaz bir eme
Çün ermedi aşka deme varsın kim ol bî-cân imiş
Ko gitsin ol derdsiz ebter bu derd bize dermân yeter
Kim bundan anda derd ilter yardımcısı Sübhân imiş
Derdlilerin âh u sûzu hoş cûşa getirir bizi
Derdsizlerin serd serd sözü kati zemherîden imiş
Derdsizleri görür gözüm yanar içim göner özüm
Kim ol bîçâre gözsüzün kılavuzu şeytân imiş
Maksûd bu ilm ü amelden bir derd-i âh ü sûz imiş
Çün derd ü âh ü sûzun yok bu âd sana bühtân imiş
Gel Dost derdine düş yürü bî-derd olandan gen yürü
Bî-derd olanların yeri cehennemde katrân imiş
Kim ki bu derde düşmedi bir mürşide erişmedi
Çiğdir ol dahî pişmedi pes süstlüğü andan imiş
Gelsin derdli âşık kanı versin cânı alsın yâri
Dost yoluna olmak fânî âşıklara erkân imiş
Eşrefoğlu Rûmî senin gün gün artsın derdin hemîn
Çün katında bu dünyânın vârı yoğu yeksân imiş
Bunun fânî lezzetine aldanmagıl şöhretine
Mağrûr olma devletine hîlesi çok fettân imiş
Eşrefoğlu Rûmî
Kuddise Sırruh