Bu Felâket Seyrine Bir Çeşm-i Bîdâr Kalmamış
16 Aralık 2019 tarihinde yayınlanmıştır.
NUTK-İ ŞERÎF
Bu felâket seyrine bir çeşm-i bîdâr kalmamış
Bu melâhat şem'ine bir gûş-i hüşyâr kalmamış
Gül gider bülbül gider sünbül gider gülşen gider
Bu zevâlin sür'atine ferd-i gamhâr kalmamış
Mihr-i eflâk-ı selâmet âşikâr etmiş gurûb
'Âkıbet-endîş olan bir ferd zinhâr kalmamış
Hürmeti vâcib olan eşyâ bugün tahkîrdedir
Cân vere cânân yolunda mîr-i nâmdâr kalmamış
Rûz-i haşre dek muhakkak evliyâ noksân değil
Şîr-i meydân-ı diyânet kâfî mikdâr kalmamış
Sürh-renk seller gider gayret-i Hakk eyler zuhûr
Kıl nazar Allah içün bu nâsda hiç 'âr kalmamış
"Fânî fi'd-dünyâ" olan eşhâs hayvândan beter
Lutfiyâ nusret eder sanma ki dindâr kalmamış
Alvarlı Efe Hâce Muhammed Lutfî
Kaddesallahu Sırrahu'l-Âlî