Bu Fenâ Mülkünde Ben Nice Nice Hayrân Olam
28 Aralık 2018 tarihinde yayınlanmıştır.
Bu fenâ mülkünde ben nice nice hayrân olam
Nice bir handân olam yâ nice bir giryân olam
Geh feleklerde meleklerden dilekler eyleyem
Gâhı 'arş u şems ile gerdün olam gerdân olam
Adımım atdım yedi dört on sekiz binden öte
Dokuzu yolda koyup şâh emrine fermân olam
Dost ferâh kıldı terâhdan ben teberrâ eyledim
Sûretâ insân olam hem cân u hem cânân olam
Gâh bir müftî müderris gâh mümeyyiz gâh temiz
Gâh müdebbir nâkıs u geh naks ile noksân olam
Gâh batn-ı hût içinde Yûnus ile söyleşem
Geh çıkam 'arş üzere bir cân olam Selmân olam
Gâh inem esfellere şeytân ile şerler düzem
Geh çıkam 'arş üstüne seyrân olam cevlân olam
Geh varup bir sır olam hem işidem hem söyleyem
Bir civân olup gehi insân olam nisyân olam
Gâh ma'kûlât u meşrû'ât u takrîr ü beyân
Gâhi maksûrât olam gâh sâhib-i keyvân olam
Nice bir sûretde insân ü sıfatda cânavâr
Nice bir tilki olam yâ kurd u yâ arslan olam
Nice bir tecrîd ü tefrîd ü mücerred münferid
Nice bir cinnî vü insî yâ nice şeytân olam
Nice bir 'aşk meydânında nefs atın seğirtdirem
Yâ nice bir başımı top eyleyüp çevgân olam
Birlik ile bir olam birlik benimle bir ola
Geh dönem deryâ olam katre olam 'ummân olam
Gâh duzahda yanam Firavn ile Hâmân ile
Gâh cennete varam Gılmân ile Rıdvân olam
Gâh cennete varam Gılmân ile Rıdvân olam
Gâh bir gâzî olam Efreng ile ceng eyleyem
Geh dönem Efreng olam nisyân ile 'ısyân olam
Gâh bir mechûl olam merdûd olam Nemrûd olam
Geh varam Ca'fer olam Tayyâr olam perrân olam
Gâh bir nâmî olam 'ilm ile kâm ıssı olam
Cehl ile geh yürüyem nâ-kâm olam nâdân olam
Geh yıkam gâhî yakam yeryüzünü perrân idem
Geh varam 'arşa çıkam hem şâh olam sultân olam
Değmeler bu sırra ermezler ledünnîdir 'azîz
Hızr'ı koyup yolda ben kerrûb ile gerdân olam
Nice bir derdler ile odlara yanam yakılam
Nice bir şâkir olam zâkir olam mihmân olam
Yâ nice bir dost ile ol ben olam ben ol olam
Yâ nice ırak düşem mahzûn olam ahzân olam
Terk idem nâr ile hâki bâdı nârı aslına
Şeş cihetde ben çıkam bî-ten olam bî-cân olam
Nice bir Cercîs ü Bercîs olam u Mirrîh olam
Nice bir Câlinûs u Bukrât olam Lokmân olam
Bu dokuz arslan u yedi evren ü dört ejderhâ
Bunlarınla ceng idem Rüstem olam destân olam
Bir demi âsûde bir dem gaflet ile hurd u hâm
Bir demi âşüfte olam Mecnûn olam hayrân olam
Gönlümün gencine rencler ermeden bir yol bulam
Yâhud deryâya girem bî-reng ü bî-elvân olam
Cân ile 'ârif olup senlik ü benlik terk idem
Geh varup dilsüz olam öksüz olam hayvân olam
Çün de derler n'ideyim demezse yanar cân u ten
Ben dahi dürler dökem dosta hezâr destân olam
Kâr olam bî-kâr olam 'âriflere esrâr olam
Geh dönem gerdân olam güftâr olam Nu'mân olam
Geh varam balçık olam geh dönüben gird-i hâk
Geh varam gevher olam yâkût olam mercân olam
Âdemîlikden çıkam uçam melekler mülkine
Levn olam bî-levn olam geh kevn olam bî-kân olam
Geh mutî' olam Hudâ'nın emrine bin cân ile
Geh dönem 'âsî olam Mûsâ olam 'İmrân olam
Geh varam Dâvûd olam çıkam Süleymân tahtına
Geh gine gümrâh olup vaslı koyup hicrân olam
Gâh zindândan çıkam âzâd olam âbâd olam
Geh gine derbân olam mahbûs olam zindân olam
Dâr olam girdâr olam ber-dâr olam Mansûr olam
Cân olam hem ten olam hem în olam hem ân olam
Geh beyâbân u harâb u geh serâb u geh türâb
Geh gine ma'mûr olam geh çetr ü geh sayvân olam
Gâh 'izzetle varup mü'mîn olam devletlü ben
Geh varam rükkân olam rehber olam ruhbân olam
Geh dönem hâmûş olam geh cûş idem geh hûş olam
Geh dönüp pür-reng ilen hem bâğ u hem bostân olam
Gâh varam bir sâz olam bir söz olam pür-sûz olam
Geh varam imkân olam îmân olam ihsân olam
Dem olam Âdem olam 'âlem olam 'âlemde ben
Dem olam bî-dem olam hem nâm olam hem nân olam
Yûnus'a Tapduk u Saltuk u Barak'dandır nasîb
Çün gönülden cûş kıldı ben nice pinhân olam
Yûnus imdi bu sözü sen 'âşıka de 'âşıka
Kim sana ben sıdk olam hem derd ü hem dermân olam
Gâh hâlis ü gâh muhlis olam uş Furkân ile
Gâh Rahmâni'r-Rahîm yâ Hayy u yâ Mennân olam
Geh dönem bir şems olam zerremde yüz bin 'arş ola
Geh yine tuğyân olam 'âlemlere tûfân olam
Evveli Hû âhiri Hû yâ Hû illâ Hû olam
Evvel âhir ol kala vü "men aleyhâ fân" olam
Yûnus Emre
Kuddise Sırruh
Kuddise Sırruh