Bu Gönlüm Sevdi Bir Yâri ki Vechi Âfitâb Ancak
10 Temmuz 2020 tarihinde yayınlanmıştır.
NUTK-İ ŞERÎF
Bu gönlüm sevdi bir yâri ki vechi âfitâb ancak
Anın bu âfitâb yanında gûyâ bir şihâb ancak
Sayılmaz etdiği fazl u kerem bu bendesine çün
Ki 'uşşâkına in'âmı o şâhın bî-hisâb ancak
Visâli 'ıyd-ı ekberdir o hûbun yok nazîri hîç
Firâkı nâr-ı dûzahdan eşedd mühlik 'azâb ancak
Muhabbet etmeyen ana sürülür bâb-ı Yezdân'dan
Olur hem ol şakînin dîn ü 'ukbâsı harâb ancak
Cihânın pâdişâhları eşiğine sürerler yüz
Halâik içre bî-misl ü bedel 'âlî-cenâb ancak
Kapusunda mülâzım ol murâda ermek istersen
Anın bâbında zîrâ hep du'âlar müstecâb ancak
Anınçün kim vücûda geldi bu cümle-i mahlûkât
Anınçün kurulmuşdur muhakkak bu dolâb ancak
Tevessül etdiler cümle nebîler Hakk'a anınla
Olur anı vesîle etmek ile feth-i bâb ancak
Bu Kuddûsî anın 'âşıklarının hâk-i pâyidir
Hemân bu tarz ile maksûdu ana intisâb ancak
Ahmed Kuddûsî
Kuddise Sırruh