Bu Pendi Okuyup Tutan Olur Hâss Bende Yezdân'a
15 Haziran 2019 tarihinde yayınlanmıştır.
NASÎHAT
Bu pendi okuyup tutan olur hâss bende Yezdân'a
Karışır 'âkıbet bir gün gürûh-ı ehl-i 'irfâna
Sevicek bir kulun Mevlâ virir birkaç güzel ahlâk
Günâhın mağfiret eyler ki koymaz anı nîrâna
Eğer sevmez ise bir kimseyi virir kötü ahlâk
Kabûl itmez anın a'mâlini kor dâr-ı hizlâna
Tevazu' it tezellül it tevekkül it terahhum it
Tezekkür it tefekkür it ta'abbüd eyle Rahmân'a
Muhabbet eyle ehl-i 'ilm ü 'irfân u salâha çün
Ki bunlar sevgili bil Hazret-i Hallâk-ı ekvâna
Yetâmâya garîbe hem fakîre eylegil ikrâm
Kebîre eyle tevkîr merhamet it hem sagîrâna
Sebebsiz kimseyi incitme hîç it Müntakim'den havf
Refîk ol rıfk u lutf eyle kamu insâna hayvâna
Eğer i'lân iderse zenbini bir fâsık u fâcir
Hemân buğz it edeb bilmez hayâ bilmez o bîgâna
Dahi küffâr-ı bed-kâre münâfık mülhide buğz it
Mukârin olma yok ise zarûret sû-yi akrâna
Tecessüs eylemek câiz değil mü'minlerin 'aybın
Görürsen dahi setr eyle dime yârâna düşmâna
İki kişiye zinhâr olma mûnis hem yakîn olma
Bu dünyâ ehline dahi sakalsız tâze oğlâna
Çalış tevhîde gâfil olma bir dem zikr-i Mevlâ'dan
Bu Kuddûsî ider nushu sana hem cümle yârâna
Ahmed Kuddûsî
Kuddise Sırruh