Bulaydım Dilde Dildârım Bana Mûnis Kim Olmazdı
28 Eylül 2023 tarihinde yayınlanmıştır.
NUTK-İ ŞERÎF
Bulaydım dilde dildârım bana mûnis kim olmazdı
Bana yâr olmasa yârım ana dil muhkem olmazdı
Dil ehli bulmasaydı dilde yüz bin zevk i rûhânî
Komazdı şehvet ü cismi e'azz ü a'lem olmazdı
Tama'sız âdemin halk ı cihân hep akrabâsıdır
Kanâ'at kılmasaydım hep bana hâl ü 'âmm olmazdı
Gam ü derd ü belâ hep hubb-i dünyâdan gelir kalbe
Kamuyu terk edeydim hoş gönülde mâtem olmazdı
Kamu dünya vü mâ-fîhâ hayâl ü hâbdır ammâ
Bileydi hufte kim düşdür anınçün pür-gam olmazdı
O cân kim gaflete dalmış hayâl ü hâb ile kalmış
Uyansa hâb-ı gafletden esamm ü ebkem olmazdı
Biri zindân-ı gam görmüş biri hoş gülşene ermiş
Dil âgâh olsa kendinden o gayre hem-dem olmazdı
Ko nâm ü şânı dervîş ol seni sen görme bîhûş ol
Olaydı pür derûn-i ney demâdem pür-dem olmazdı
Eğer terk etmese halkı dahi her şehvet-i hulku
O şâh-ı 'aşka bu Hakkı gönülde mahrem olmazdı
Erzurumlu İbrâhim Hakkı
Kuddise Sırruh