Çalab Âdem Cismini Toprakdan Var Eyledi
9 Temmuz 2018 tarihinde yayınlanmıştır.
NUTK-İ ŞERÎF
Çalab Âdem cismini toprakdan vâr eyledi
Şeytân geldi Âdem'e tapmağa 'âr eyledi
Eydür ben oddan nûrdan ol bir avuç toprakdan
Bilmedi kim Âdem'in için gevher eyledi
Zâhir gördü Âdem'in bâtınına bakmadı
Bilmedi kim Âdem'i halka server eyledi
Kırk yıl kalıbı yatdı adı 'âlemi tutdu
Gör şeytânı buğzundan ne fitneler eyledi
Âdem toprak yatmışdı at 'âlemi tutmuşdu
Fikrine bak İblîs'in ya'ni hüner eyledi
Ol yürüyen atları sürdü Âdem üstüne
Âdem'e mekr irgürüp ya'ni zafer eyledi
Âdem'in göbeğinden Çalab yaratdı anı
Vaff diyüp turu geldi anlar güzer eyledi
Çün gitdi Âdem 'ahdi yetdi Mûsâ'nın vaktı
İblîs'e işbu işler yavlak eser eyledi
Mûsâ gönüldü Tûr'a Hakk'la münâcât kıla
Gördü kim bir su akar Mûsâ nazar eyledi
Mûsâ eydür göreyim bu su ne yerden gelir
Ger böyle akar ise zîr ü zeber eyledi
İleri vardı Mûsâ la'în oturmuş ağlar
Gözünün yaşı imiş ol su pınar eyledi
Mûsâ sordı la'îne ağladığın nedendir
N'ideyim ağlamadan der işim zâr eyledi
Mukarrrebdim Mûsâ ben ol Hakk'ın dergâhında
Götürdü urdu yere işimi şer eyledi
Sen bilmez misin Mûsâ ben neden ayrıldığım
Şunlar öğüme düşdü beni humâr eyledi
Vargıl degil yâ Mûsâ rahmet eylesin bana
Tevbe kılup işine hoş istiğfâr eyledi
Mûsâ irdi hâcete Hakk'ıla münâcâta
Unutdu emâneti söz muhtasâr eyledi
Hakk Mûsâ'ya eyitdi unutdun emâneti
Ol nidâya cânını Mûsâ nisâr eyledi
Vargıl degil yâ Mûsâ rahmet edeyim ana
Secde etsin Âdem'e çün istiğfâr eyledi
Mûsâ geldi la'îne dedi Hakk'ın buyruğun
Secdeyi işidicek döndü inkâr eyledi
Ben andan umar idim derdime dermân kıla
Daha artırdı derdim ya'ni tîmâr eyledi
Ben eğer tapsam ana ol vaktin tapar idim
Şimdi hod toprak olup zîr ü zeber eyledi
Âdem İblîs kim ola işi işleden Çalab
Ayı günü yaradup leyl ü nehâr eyledi
Ma'nâ nedir İblîs'den câhillik kamu bizden
Ne duydun iş bu sözden sırrı esrâr eyledi
Çalab eydür şol kula 'inâyet benden ola
Ne şeytân azdırısar ne kimse kâr eyledi
Altı bin yedi yüzü yıldan geçen Âdem'i
Dile getirdi Yûnus söz muhtasâr eyledi
Yûnus Emre
Kuddise Sırruh