Câm-ı Aşkı Sâf Billûr Olmayınca Bilmedim
12 Nisan 2022 tarihinde yayınlanmıştır.
NUTK-İ ŞERÎF
Câm-ı 'aşkı sâf billûr olmayınca bilmedim
Zevk-i mesti âb-ı engûr olmayınca bilmedim
Mahv edüp pervâneyi sûzân eden 'aşk âteşin
Cezbe-i zikr ile tennûr olmayınca bilmedim
Mazhar-ı feyz-i hayât-ı bâkîyi ba'de'l-fenâ
Nefha-i tevhîd ile sûr olmayınca bilmedim
Kâf-ı dilde câlis-i taht-ı Süleymân olmağı
Yok olup bu varlığım mûr olmayınca bilmedim
Aradım envâr-ı lâhût neş'esin vicdânda
Kayd-ı nâsût aradan dûr olmayınca bilmedim
Rü'yet-i dîdâr-ı Hakk'da "len terânî" remzini
Zerre zerre aşk ile Tûr olmayınca bilmedim
Kisve-i âl-i abâ Enver hakîkat sırrını
Vahdet-i mürşidle pürnûr olmayınca bilmedim
Şeyh Mustafa Enver Efendi
Kuddise Sırruh